യുറാൻഷ്യ ബുക്കിലെ പ്രപഞ്ചശാസ്ത്രം: റെഡ് ഷിഫ്റ്റ്, ബഹിരാകാശ ശ്വസനം, ഭാരതീയ ഹിന്ദു വേദസാഹിത്യത്തിന്റെ ഉത്ഭവം!

​1955-ൽ യുറാൻഷ്യ ബുക്ക് (The Urantia Book) എന്ന 2200 പേജുകൾ ഉള്ള മഹാഗ്രന്ഥം ഇംഗ്ലീഷിൽ അമേരിക്കയിൽ ഒരു മനുഷ്യന്റെയും പേരില്ലാതെ പ്രസിദ്ധീകരിക്കപ്പെടുന്ന സമയത്ത് ആധുനിക ശാസ്ത്ര  ലോകം  പുതിയ പുതിയ ശാസ്ത്രസിദ്ധാന്തങ്ങൾ അവതരിപ്പിയ്ക്കയും അവ ശരിയോ തെറ്റോ എന്നു കണ്ടെത്താൻ പരിശ്രമിയ്ക്കയും ചെയ്യുന്ന കാലഘട്ടം ആയിരുന്നു. പ്രശസ്ത ശാസ്ത്രകാരന്മാർ അവരുടെ സിദ്ധാന്തങ്ങൾ കാര്യകാരണ സഹിതം ശാസ്ത്ര ലേഖനങ്ങൾ വഴി അവതരിപ്പിച്ചു കൊണ്ടിരുന്നെങ്കിലും പൊതുവിൽ ജനങ്ങൾക്ക് ഇതിലൊന്നും  അറിവുണ്ടായിരുന്നില്ല. 

ഗാലക്സികൾ ഒരു കേന്ദ്ര സ്ഫോടനത്തിന് ശേഷം വലിയ വേഗതയിൽ അകലേക്ക് പാഞ്ഞുപൊയ്ക്കൊണ്ടിരിക്കുകയാണെന്നുംഇതിന്റെ ഫലമായാണ് അവയിൽ നിന്നുള്ള പ്രകാശത്തിന് റെഡ് ഷിഫ്റ്റ് (Redshift) ഉണ്ടാകുന്നതെന്നുമുള്ള ബിഗ് ബാങ്ങ് പ്രപഞ്ച ഉൽപ്പത്തി സിദ്ധാന്തം (Big Bang Theory of Universe Creation ) അക്കാലത്താണ് ശാസ്ത്രലോകം ചർച്ച ചെയ്യാനും അംഗീകരിക്കാനും തുടങ്ങിയത്.

​എന്നാൽ, അതിശയകരമായി ഒരു മനുഷ്യരുടെയും പേരില്ലാതെ പ്രസിദ്ധീകരിക്കപ്പെട്ട യുറാൻഷ്യ ബുക്ക് എന്ന വിജ്ഞാനകോശത്തിന്റെ താളുകളിൽ റെഡ് ഷിഫ്റ്റ് പ്രതിഭാസത്തെക്കുറിച്ച് തികച്ചും വ്യത്യസ്തമായ ഒരു വിശദീകരണവും, ബാഹ്യ ബഹിരാകാശ തലങ്ങളുടെ കൃത്യമായ ഘടനയും, പുരാതന ഭാരതത്തിലെ വേദഗ്രന്ഥ സാഹിത്യവുമായി ഈ പ്രപഞ്ചസത്യങ്ങൾക്കുള്ള ആഴത്തിലുള്ള ബന്ധവും ആധുനിക മനുഷ്യർക്ക് മനസ്സിലാകുന്ന ഭാഷയിലും രീതിയിലും വിവരിച്ചിരിക്കുന്നു എന്നത് അതിശയം എന്നേ പറയേണ്ടൂ.

​റെഡ് ഷിഫ്റ്റ് പ്രതിഭാസത്തെക്കുറിച്ചുള്ള യുറാൻഷ്യ പുസ്തക വിശദീകരണം:

​ഇരുപതാം നൂറ്റാണ്ടിലെ സാധാരണ പ്രപഞ്ചശാസ്ത്രം റെഡ് ഷിഫ്റ്റിനെ ഗാലക്സികളുടെ വേഗതയേറിയ അകൽച്ചയായി (Doppler recession velocity) മാത്രം വ്യാഖ്യാനിച്ചപ്പോൾ, യുറാൻഷ്യ ബുക്കിലെ പന്ത്രണ്ടാം പ്രബന്ധം ( Paper -12: The Universe of Universes) ഈ ധാരണ ശരിയല്ല എന്നു മനുഷ്യരോട് പറഞ്ഞു തരുന്നു . ഭൂമിയിലെ ശാസ്ത്ര ഉപകരണങ്ങൾ പ്രാദേശികവും യന്ത്രപരവുമായ ബലങ്ങളെ കണക്കിലെടുക്കാതെ പ്രകാശത്തിന്റെ ചുവപ്പുരാശിയെ തെറ്റായി വ്യാഖ്യാനിക്കുകയാണെന്ന്  ഈ പുസ്തകത്തിലെ ഈ പ്രബന്ധം മനുഷ്യരുടെ അറിവിലേക്ക് വെളിപ്പെടുത്തുന്ന അമാനുഷിക ലേഖകൻ പറഞ്ഞു തരുന്നു. അങ്ങനെ പറഞ്ഞു തരുന്ന വിവരങ്ങളിൽ ചിലത് എന്തൊക്കെ എന്നു നോക്കാം:

​ബഹിരാകാശ ശ്വസനം (Space Respiration):

ബഹിരാകാശം നിശ്ചലമല്ല; അത് താളാത്മകമായി വികസിക്കുകയും സങ്കോചിക്കുകയും ചെയ്യുന്നു. 100 കോടി വർഷം പുറത്തേക്ക് വികസിക്കുകയും അടുത്ത 100 കോടി വർഷം ഉള്ളിലേക്ക് സങ്കോചിക്കുകയും ചെയ്യുന്ന 200 കോടി വർഷത്തിന്റെ ഒരു ചക്രമാണിത്. ഗാലക്സികൾ ഈ ശ്വസിക്കുന്ന (വികസിക്കയും ചുരുങ്ങുകയും ചെയ്യുന്ന പ്രക്രിയ) ബഹിരാകാശത്തിനുള്ളിലാണ് നിലകൊള്ളുന്നത്.

​പ്രപഞ്ച കേന്ദ്രത്തിന് ചുറ്റുമുള്ള ഭ്രമണം:

ഗാലക്സികൾ നേർരേഖയിൽ പുറത്തേക്ക് പായുകയല്ല ചെയ്യുന്നത്. മറിച്ച്, അവ സൃഷ്ടിയുടെ നിശ്ചല കേന്ദ്രമായ പാരഡൈസിന് (Paradise) ചുറ്റുമുള്ള വലിയ ഭ്രമണപഥങ്ങളിൽ കറങ്ങിക്കൊണ്ടിരിക്കുകയാണ്.

​ഇന്റർഗാലക്റ്റിക് പ്രകാശ നഷ്ടം:

വിദൂരമായ ബഹിരാകാശത്തിലൂടെ സഞ്ചരിക്കുമ്പോൾ, പ്രകാശം ഗുരുത്വാകർഷണ ബലങ്ങളെയും തടസ്സങ്ങളെയും നേരിടുകയും ഊർജ്ജം നഷ്ടപ്പെടുകയും ചെയ്യുന്നു. ഈ ഊർജ്ജനഷ്ടത്തെയാണ് ശാസ്ത്രജ്ഞർ ഗാലക്സികളുടെ വേഗതയേറിയ അകൽച്ചയായി തെറ്റിദ്ധരിക്കുന്നത്.

​ബാഹ്യ ബഹിരാകാശ തലങ്ങളുടെ ഘടന:

​പ്രപഞ്ചം അരാജകമായ ഒരു ശൂന്യതയല്ല, മറിച്ച് കൃത്യമായി ക്രമീകരിച്ചിരിക്കുന്ന ഒന്നാണെന്ന് യുറാൻഷ്യ ബുക്ക് വിവരിക്കുന്നു:

​പാരഡൈസ് (Isle of Paradise) എന്ന പ്രപഞ്ച കേന്ദ്രം : സൃഷ്ടി അല്ലാത്ത സ്ഥിരമായ പ്രപഞ്ച കേന്ദ്രം - അനാദി കാലമായി നില നിൽക്കുന്ന, എല്ലാ ശക്തികളുടെയും പരമോന്നത ദൈവത്തിന്റെയും ആസ്ഥാനം.

 

​കേന്ദ്ര പ്രപഞ്ചം (Havona): പാരഡൈസിന് ചുറ്റുമുള്ള 100 കോടി പൂർണ്ണതയുള്ള ലോകങ്ങളുടെ വലയം.

​ഏഴ് വൻ പ്രപഞ്ചങ്ങൾ (Seven Superuniverses): ഭൂമിയെപ്പോലെ ജീവജാലങ്ങൾ വസിക്കുന്ന കോടിക്കണക്കിന് ഗ്രഹ ലോകങ്ങൾ ഉൾപ്പെടുന്ന വൻകിട പ്രപഞ്ചങ്ങൾ . നമ്മുടെ പ്രാദേശിക പ്രപഞ്ചമായ നെബഡോണും (Nebadon) ഭൂമിയും (യുറാൻഷ്യ) ഏഴാമത്തെ സൂപ്പർ യൂണിവേഴ്സായ ഓർവോൺട്ടണിലാണ് (Orvonton) സ്ഥിതി ചെയ്യുന്നത്. അനേക ലക്ഷം ഗാലക്സികൾ ഉൾപ്പെടുന്നതാണ് ഈ ഏഴു വൻ പ്രപഞ്ചങ്ങളും.

​ബാഹ്യ ബഹിരാകാശ തലങ്ങൾ (Outer Space Levels): ജീവജാലങ്ങളില്ലാത്ത, ഭാവി പ്രപഞ്ചങ്ങൾക്കായി ഊർജ്ജ രൂപീകരണം നടക്കുന്ന നാല് വലിയ ബാഹ്യ വലയങ്ങൾ.

​എതിർ ദിശയിലുള്ള ഭ്രമണങ്ങൾ (Counter-Rotating Circuits):

പ്രപഞ്ചത്തിന്റെ ഗുരുത്വാകർഷണ സന്തുലിതാവസ്ഥ നിലനിർത്താൻ, തൊട്ടടുത്തുള്ള ബഹിരാകാശ തലങ്ങൾ എതിർ ദിശകളിലാണ് കറങ്ങുന്നത്. നമ്മുടെ ഏഴ് സൂപ്പർ യൂണിവേഴ്സുകൾ ക്ലോക്ക്‌വൈസ് (Clockwise) ദിശയിൽ കറങ്ങുമ്പോൾ, ഒന്നാമത്തെ ബാഹ്യ ബഹിരാകാശ തലം കൗണ്ടർ-ക്ലോക്ക്‌വൈസ് (Counter-clockwise) ദിശയിലാണ് കറങ്ങുന്നത്. രണ്ടാമത്തെ തലം വീണ്ടും ക്ലോക്ക്‌വൈസ് ദിശയിലേക്ക് മാറുന്നു. ഇവയ്ക്കിടയിലുള്ള ശാന്തമായ ബഹിരാകാശ മേഖലകൾ (Mid-space zones) കൂട്ടിയിടികളും ഘർഷണങ്ങളും ഒഴിവാക്കുന്നു.

​1955-ലെ ശാസ്ത്രീയ പശ്ചാത്തലം:

​1955-ന് മുമ്പ് മറ്റൊരു പുസ്തകത്തിലോ ലേഖനത്തിലോ ഇങ്ങനെ പൂർണ്ണമായ ഒരു പ്രപഞ്ച മാതൃക പ്രസിദ്ധീകരിച്ചിരുന്നില്ല. എന്നിരുന്നാലും, ഇതിൽ ചില സിദ്ധാന്തങ്ങൾ 1920-കളിലും 1930-കളിലും ചില ശാസ്ത്രജ്ഞർ ചർച്ച ചെയ്തിരുന്നു എന്നു പറയപ്പെടുന്നു.

​ഫ്രിറ്റ്സ് സ്വിക്കി (Fritz Zwicky - 1929): പ്രകാശം ദൂരം സഞ്ചരിക്കുമ്പോൾ ഊർജ്ജം നഷ്ടപ്പെടുന്നു എന്ന "ടയേർഡ് ലൈറ്റ്" (Tired Light) സിദ്ധാന്തം അവതരിപ്പിച്ചു.

​റിച്ചാർഡ്  ടോൾമാൻ & ജോർജ്ജ് ലെമൈറ്റർ (1931-1933): പ്രപഞ്ചം വികസിക്കുകയും സങ്കോചിക്കുകയും ചെയ്യുന്ന "ഓസിലേറ്ററി" മാതൃകകൾ കണക്കുകൂട്ടി.

​ആർതർ എഡിംഗ്ടൺ (1930): ബഹിരാകാശം തന്നെയാണ് വികസിക്കുന്നത് എന്ന ആശയം മുന്നോട്ടുവെച്ചു.

​ഈ ശാസ്ത്രീയ ആശയങ്ങളെല്ലാം നിലനിന്നിരുന്നെങ്കിലും, ബഹിരാകാശ ശ്വസനം, എതിർ ദിശകളിൽ കറങ്ങുന്ന പ്രപഞ്ച വലയങ്ങൾ, പാരഡൈസ് എന്ന കേന്ദ്ര ബിന്ദു എന്നിവയെല്ലാം കൂട്ടിച്ചേർത്തുള്ള സമഗ്രമായ പ്രപഞ്ച ഘടന 1955-ൽ യുറാൻഷ്യ പുസ്തകത്തിലൂടെയാണ് ആദ്യമായി പുറത്തുവന്നത്.

​ഹിന്ദു വേദഗ്രന്ഥ ബന്ധം: സേലത്തിൽ നിന്നുള്ള വെളിപാട്!

​യുറാൻഷ്യ പ്രപഞ്ചശാസ്ത്രവും പുരാതന ഭാരതീയ ഗ്രന്ഥങ്ങളും തമ്മിലുള്ള സാമ്യം യാദൃശ്ചികമല്ല. പേപ്പർ 94 (The Melchizedek Teachings in the Orient) ഇതിന്റെ ചരിത്രപരമായ പശ്ചാത്തലം വ്യക്തമാക്കുന്നു: ബി.സി.ഇ 1900-ൽ മാക്കിവേന്താ മെൽക്കീസദെക് (Machiventa Melchizedek) എന്ന അമാനുഷിക ആത്മീക വ്യക്തി സേലത്ത് ( ഇന്നത്തെ ജെറുസലേം) മനുഷ്യ രൂപത്തിൽ അവതരിക്കുകയും, തുടർന്ന് അദ്ദേഹത്തിന്റെ 94 പ്രചാരകർ ഈ സത്യങ്ങളുമായി ഭാരതത്തിലേക്ക് വരികയും ചെയ്തു.

​ഇവരിൽ കൂടി ലഭിച്ച അറിവുകൾ ഭാരതത്തിലെ നിലവിലുള്ള പാരമ്പര്യങ്ങളുമായി ലയിച്ച് വൈദിക ചിന്തകൾക്ക് രൂപം നൽകി:

​ബ്രഹ്മാവിന്റെ ശ്വാസോച്ഛ്വാസം: മെൽക്കീസദെക് പഠിപ്പിച്ച ബഹിരാകാശ ശ്വസനം (Space Respiration) ആണ് പിന്നീട് വൈദിക സാഹിത്യത്തിൽ സൃഷ്ടിയും പ്രളയവും (Srishti & Pralaya) അഥവാ ബ്രഹ്മാവിന്റെ ശ്വാസോച്ഛ്വാസം എന്ന ആശയമായി മാറിയത്.

​ബ്രഹ്മം (Brahman): പ്രപഞ്ചത്തിന്റെ ആദ്യ കാരണം (First Cause) എന്ന ഉപദേശം വൈദിക തത്ത്വചിന്തയിൽ 'ബ്രഹ്മം' എന്ന പരമമായ സത്യമായി പരിണമിച്ചു.

​മേരു പർവ്വതവും കേന്ദ്രവും: പാരഡൈസിന് ചുറ്റും കറങ്ങുന്ന പ്രപഞ്ച തലങ്ങൾ എന്നത് പുരാണങ്ങളിൽ മേരു പർവ്വതത്തിന് ചുറ്റുമുള്ള ലോകങ്ങളായി ചിത്രീകരിക്കപ്പെട്ടു.

​ഋതം (Rta): പ്രപഞ്ചം കൃത്യമായ നിയമങ്ങൾക്ക് വിധേയമായാണ് പ്രവർത്തിക്കുന്നത് എന്ന തത്ത്വം ഋഗ്വേദത്തിൽ 'ഋതം' (സാർവത്രിക നിയമം) ആയി മാറിയതാണ്.

​നൂറ്റാണ്ടുകളിലൂടെ വാമൊഴിയായി കൈമാറ്റം ചെയ്യപ്പെട്ടപ്പോൾ ഈ  സത്യങ്ങൾ കാവ്യരൂപങ്ങളായും പ്രതീകാത്മക കഥകളായും മാറ്റപ്പെട്ടു. എങ്കിലും, പുരാതന വൈദിക സൂക്തങ്ങൾക്കുള്ളിൽ കിടക്കുന്നത് സേലത്തിൽ നിന്ന് ലഭിച്ച പ്രപഞ്ച വെളിപാടിന്റെ അതേ രൂപരേഖ തന്നെയാണ്.

ഇതൊക്കെ മനസ്സിലാക്കണമെങ്കിൽ യുറാൻഷ്യ പുസ്തകം വായിച്ചു പഠിക്കണം. എല്ലാവർക്കും സാധിക്കണമെന്നില്ല. എന്നാൽ സാധിയ്ക്കുന്നവർ ധാരാളം ഇന്ന് ഈ ലോകത്തിൽ ഉണ്ട്. എന്നാൽ അവർ പോലും അതു മനസ്സിലാക്കാൻ ശ്രമിയ്ക്കുന്നില്ല എന്നതിനും കാരണങ്ങൾ ഉണ്ട്. അതും യുറാൻഷ്യ പുസ്തകം വെളിപ്പെടുത്തുന്നുണ്ട്.