Monday, January 23, 2012

ആത്മീയ പ്രബോധന സേവനങ്ങളെ കുറിച്ച് ചില കാര്യങ്ങള്‍.

കേരളത്തില്‍ നിന്നും പത്തു മൂവായിരം കിലോമീറ്റര്‍ അകലെ താമസിക്കുന്ന ഒരു മറു നാടന്‍ മലയാളി ആയ എനിക്ക് കേരളത്തിലെ എല്ലാ ടി വി ചാനലുകളും കാണാന്‍ സൗകര്യം ഇല്ല എന്ന് തന്നെ പറയാം. മലയാളി കൂട്ടങ്ങള്‍ അധികമൊന്നും ഇല്ലാത്തതിനാല്‍ കേബിളുകാരും ഡി ടി എച്ച് കാരും വളരെ വിഷമിച്ച് ഒന്ന് രണ്ടു മലയാള ചാനെലുകള്‍ അവരുടെ പാക്കേജില്‍ ഉള്‍പെടുത്തിയാല്‍ അത് തന്നെ വലിയ ഭാഗ്യം.

എല്ലാ മലയാള ചാനെലുകളും കിട്ടിയാത്തന്നെ അത് കാണാനോ നോക്കാനോ ഉള്ള സമയമോ സാവകാശാമോ എനിക്കില്ല എന്നത് വേറൊരു കാര്യം. ഒന്ന് രണ്ടു തന്നെ ധാരാളം!

പറയാന്‍ വന്നത് ഇതൊന്നുമല്ല.

പതിവായി രാവിലെ സൂര്യ ടി വി കാണുന്നത് ഒരു പതിവായിരിക്കുന്നു.

സൂര്യക്കാര്‍ രാവിലെ ഒന്ന് രണ്ടു സ്ലോട്ടുകള്‍ ആത്മീയ പ്രബോധനങ്ങള്‍ക്ക് മാത്രമായി മാറ്റി വച്ചിരിക്കുന്നു.

കൂടുതലും ക്രൈസ്തവ സ്വതന്ത്ര വിഭാഗങ്ങളുടെ തീവ്രതയാര്‍ന്ന പ്രഭാഷണങ്ങളും രോഗ ശാന്തി പ്രാര്‍ഥനകളും.

പലയിടങ്ങളിലായി നടക്കുന്ന കൂട്ടായ്മകളുടെ എഡിറ്റ്‌ ചെയ്ത റെക്കോര്‍ഡ്‌കള്‍.

ധാരാളം ആളുകള്‍ ഈ പ്രഭാഷണങ്ങള്‍ നടക്കുന്ന സ്ഥലങ്ങളില്‍ നേരിട്ട് സംബന്ധിക്കുകയും ടി വി യില്‍ പരോക്ഷമായി കാണുകയും ചെയ്തു കൊണ്ടിരിക്കുന്നു.

ദിവസേന ഈ പ്രോഗ്രാമുകള്‍ സ്പോണ്‍സര്‍ ചെയ്യാനായി പതിനായിരമോ അതിലധികമോ കൊടുക്കാന്‍ മടിയില്ലാത്തവരും ധാരാളം.

നമ്മുടെ ജനങ്ങളില്‍ ആത്മീയത വളര്‍ന്നു വരുന്നത് നല്ലത് തന്നെ. വിമര്‍ശകര്‍ എന്ത് തന്നെ പറഞ്ഞാലും.

എന്‍റെ സഹധര്‍മിണി ഈ പ്രോഗ്രാമുകളില്‍ ചിലത് കാണുന്നത് പതിവാക്കിയിരിക്കുന്നത് കൊണ്ട് ഞാനും അത് പതിവായി ഇടയ്ക്കിടെ ശ്രദ്ധിക്കുന്നത് ഒരു പതിവാക്കിയിരിക്കുന്നു എന്നത് ഒരു വാസ്തവം.

ക്രൈസ്തവ പ്രഭാഷകരുടെ താല്‍ക്കാലിക പ്രശ്നങ്ങള്‍ക്കുള്ള  പ്രാര്‍ത്ഥനാ സേവനങ്ങള്‍ ഒരു പക്ഷെ ദൈവത്തെ കച്ചവടമാക്കുന്ന ഒരു കാര്യമായിട്ടു ചിലര്‍ക്കൊക്കെ തോന്നുമെന്കില്‍ പോലും പലര്‍ക്കും അതുമൂലം മനശാന്തിയും രോഗശാന്തിയും പ്രശ്ന പരിഹാരവും കൈവരുന്നത് മൂലമായിരിക്കുമല്ലോ ആളുകള്‍ ആ സേവനങ്ങള്‍ക്കായി ആഗ്രഹിക്കുന്നത്.

അതുമൂലം ഞാന്‍ ഈ കാര്യങ്ങളെ ഒരു മുന്‍ വിധിയോടെ കാണാന്‍ ആഗ്രഹിക്കുന്നില്ല.

നമുക്കറിയാന്‍ വയ്യാത്ത പലതും നമ്മുടെ ചുറ്റിലും നടക്കുന്നു.

അതൊന്നും അപഗ്രഥിക്കാന്‍ ഞാന്‍ ആളല്ല. അതിനൊട്ടു തുനിയുന്നുമില്ല.

ഈ പ്രഭാഷണങ്ങള്‍ കേള്‍ക്കുന്ന കൂട്ടത്തില്‍ ചില ഹൈന്ദവ സന്യാസിമാരുടെ പ്രഭാഷണങ്ങളും ഞാന്‍ കേള്‍ക്കാറുണ്ട്.

അതിലൊരു സന്യാസിയുടെ പ്രഭാഷണം എനിക്ക് വളരെ ഇഷ്ടമാണ് എന്ന് തന്നെ പറയാം.

ഭാരത സമൂഹത്തില്‍ അത്യാവശ്യം ആയിരിക്കുന്ന ചില സംഗതികളെ അദ്ദേഹം തുറന്നടിച്ചു പറയുന്നു.

കഴിഞ്ഞ ആഴ്ച അദ്ദേഹം അഞ്ചു C-കളെ കുറിച്ചു പറഞ്ഞത് ഞാനോര്‍ക്കുന്നു.

ഇന്ത്യയില്‍ ഒരു പൊതു സിവില്‍ കോഡും മതമില്ലാതെ മരിച്ചവരെ മറവു ചെയ്യാനുള്ള സൌകര്യവും വേണമെന്ന് അദ്ദേഹം പറഞ്ഞത് നമ്മുടെ രാഷ്ട്രീയക്കാരും ഭരണകര്‍ത്താക്കളും ഒന്ന് കേട്ടിരുന്നെങ്കില്‍!

പക്ഷേ, എന്ത് ചെയ്യാം?

അതൊക്കെ മനസ്സിലാക്കി ജനസേവനം നടത്തിയാല്‍ അധികാരത്തില്‍ തുടരാനാവില്ല എന്ന് അവരൊക്കെ ഭയക്കുന്നു എന്ന് വേണമെങ്കില്‍ കരുതാം.

ഇങ്ങനെയുള്ള ഭയമില്ലാത്ത നേതാക്കളെ ആണ് നമുക്കാവശ്യം.

അവരെ തുണയ്ക്കുന്ന ജനങ്ങളെയും!

[ലേഖകന്‍റെ ബ്ലോഗുകളുടെ ലിസ്റ്റ്‌ ഇവിടെ കാണാം ! ]

No comments:

Post a Comment

Your comments are welcome. Express your opinions publicly, but responsibly. Inappropriate comments promoting vulgarity or hate or spam will likely get deleted when noticed. Thank you for taking your valuable time to read this blog and share your opinions!